傻雲之家

在FB中看到一篇文章《我印象中的上水》by Elle Michelin Lam，感同身受。也談談上水。

那年暑假(升小四那年)，一家由大角咀天台屋搬到上水公屋。印象中，上水還是綠悠悠，火車站附近未有私人屋苑和商場。從我家窗口望出去，可見到天平山，有大片農地。

媽媽每天要到舊墟嘅墟仔買餸，各大小日用品也要到舊墟選購。小時候，我喜歡跟媽媽去買餸。墟仔是個迷你版街市，雖然是臨時的，但亂中有序，你可近距離接觸各小動物(魚、雞、鴨......)。墟仔還在(朋友話又叫天光墟)，只開上晝。

小學是在邨內，返上晝班，放學就返屋企食飯，做功課，間中會去對面屋玩(他們有一頭可愛小狗，它己離開幾年了，嗚......)。我和細佬曾擁有一部BMX單車(藍色的) ，媽媽會帶我哋去樓下公園踩單車。邨內好多小朋友都有自己的單車。上水好多人都用單車代步，現在也是。

中秋節會約埋對面一家人去樓下公園賞月、玩燈籠、點蠟燭(砌吓唔同嘅圖形)、仲有睇人煲蠟(煲蠟係犯法，睇都好危險，唔好學呀) 。已好多年無去樓下公園賞月， 近年仲見有人放孔明燈(唔知係唔係犯法，但都有機會燒著嘢，要好小心)。

中學亦好近，只需過條行人隧道，每日都返屋企食lunch。母校校風純樸，好少課外活動(可以講係冇) 。有時放學後會去逛街(其實我是個超乖學生，很少出街)，最鍾意去新都，有麥記、美意屋、cd鋪......。麥記是超大，夏天時，好多公公婆婆會在那裡倾吓計、食吓嘢、嘆吓冷氣。麥記還在，只是大縮水，剩下四分之一(可能更少) 。餘下的四分之三已變成三間餐廳，那麥記真是超大。

美意屋、cd鋪不見了，還有其他商場的個性小店/小餐廳都慢慢地關門大吉，仲有通利琴行、仙茶居、Pizza Hut、KFC、仙跡岩、仙踪林、客家好棧等等。天平山也慢慢改變，農地開始荒廢，建了私人屋苑和學校。

發展是無可避免，但在規劃的時有沒有顧及上水居民的需要(不只是自由行的需要) 。

上水到處都好迫，無論在火車站、街上、或商場內。火車站變了水貨客集合點，車站內外長期有大批水貨客聚集，甚至在分貨、包裝。坐火車回家，總愛坐車尾，人少啲，容易啲落車，那月台上的乘客衝進來，很可怕(甚麼請先讓乘客落車，唉)。

上水的商場，是內地自由行首選。大多數人也是說普通話，手拖行李喼，說要買甚麼，嘩啦嘩啦，以為回到國祖。從未試過有sales同我講普通話，但通常會變成invisible，無人理。

商場啲鋪頭全部都差唔多，舊墟也是。N間金鋪、N間電器鋪、N間運動用品店、N間藥房，有需要嗎? 但本地媽媽話買不到奶粉。我只知道上水物價持續上漲。

上水的租金貴，小店/小餐廳撐不下去，但為何連大型連鎖快餐店/商店/餐廳也無得留低。是有選擇性續租嗎?

回憶總是美麗。